Никотинските мастики предизвикуваат рак

Гумите за џвакање за одвикнување од пушење можат да предизвикаат појава на рак во усната празнина, предупредуваат британските лекари.

Научникот Муј Тек Тех од универзитетот во Лондон тврди дека постојаната употреба на разни замени за цигари го зголемуваат ризикот од заболување.

Истражувањето, спроведено врз 75 пациенти, покажа дека честата употреба на бонбони, гуми за џвакање и средства за инхалирање кои содржат никотин ги зголемуваат шансите за создавање тумор. Овој ризик е значително поголем кај лицата кои имаат ранички во устата.

-Пушачите треба да се охрабрат да ги остават цигарите, но никако не смееме да им препорачаме да користат замена која содржи никотин, изјави Тех.

Никотинските гуми за џвакање и сличните производи се продаваат со упатство на кое стои дека не треба да ги користиме повеќе од неколку месеци, но страсните пушачи продолжуваат да ги користат и подолго, некогаш и со години.

Тех истакнува дека најпрепорачлив метод за оставање на цигарите сепак е престанување „на суво“.